पर्यावरणपूरक( इको फ्रेंडली ) गणेश मूर्ती कार्यशाळा

संगमेश्वरच्या बीबीए बीसीए विभागातील विद्यार्थ्यांचा सहभाग

डावीकडून दुसऱ्या शिल्पकार, चित्रकार , प्राध्यापिका मीनाक्षी रामपुरे

सोलापूर प्रतिनिधी - 

गणेशोत्सव म्हणजे भक्ती, आनंद आणि सर्जनशीलता! पण यासोबतच निसर्गाची काळजी घेणं देखील तितकंच महत्त्वाचं आहे. प्लास्टर ऑफ पॅरिस (POP) मूर्तींच्या तुलनेत मातीच्या (शाडू) किंवा इको-फ्रेंडली मूर्ती पाण्यात सहज विरघळतात व प्रदूषण टाळतात.गणेशोत्सव हा आपल्या भारतीय संस्कृतीतील अत्यंत महत्त्वाचा व लोकप्रिय उत्सव आहे. दरवर्षी लाखो गणेशमूर्ती घरोघरी व सार्वजनिक ठिकाणी प्रतिष्ठापित केल्या जातात. परंतु प्लास्टर ऑफ पॅरिसच्या मूर्ती, रासायनिक रंगांचा वापर आणि त्यानंतर होणारी जलप्रदूषणाची समस्या ही दिवसेंदिवस गंभीर होत चालली आहे. या पार्श्वभूमीवर इको-फ्रेंडली गणेश मूर्ती कार्यशाळा ही काळाची गरज आहे. अशा कार्यशाळांमुळे अनेक फायदे समाजाला मिळतात.

इको फ्रेंडली गणेशमूर्ती कार्यशाळा संगमेश्वरच्या बीबीए बीसीए विभागातील विद्यार्थ्यांसोबत घेण्यात आली.कर्मयोगी अप्पासाहेब काडादी चित्रकला महाविद्यालयाच्या प्राध्यापिका, चित्रकार, शिल्पकार मीनाक्षी रामपुरे यांनी या कार्यशाळेमध्ये प्रात्यक्षिक दाखवून विद्यार्थ्यांना मार्गदर्शन केले. त्याप्रमाणे विद्यार्थ्यांनी सुबक अशा गणेश मूर्ती तयार केल्या.

           सुरुवातीला शाडू माती पाण्यात भिजवून मऊ केली जाते. त्यानंतर ती मळून लवचिक बनवली जाते. या मातीपासून साचा वापरून किंवा थेट हाताने मूर्ती घडवतात. प्रथम पायरी, देह व डोके तयार केले जाते. नंतर सोंड, कान, हात व मुकुट घडवून मूर्तीचा आकार पूर्ण करतात. मूर्ती तयार झाल्यावर तिला सावलीत वाळवतात. वाळल्यावर नैसर्गिक किंवा पाण्यात विरघळणारे रंग वापरून रंगकाम केले जाते.शाडू मातीच्या मूर्ती पाण्यात सहज विरघळतात. त्यामुळे त्या पर्यावरणपूरक ठरतात. घरगुती स्तरावरही लहान मूर्ती सहज बनवता येते. या प्रक्रियेमुळे सणासोबतच निसर्गाची काळजी घेण्याचा संदेशही मिळतो.विभागप्रमुख राजश्री हुंडेकरी यांच्या मार्गदर्शनाखाली आशा गव्हाणे, रेखा पाटील, हातोडकर, शिवानी निम्बर्गी आदींनी परिश्रम घेतले.