रोबोटिक्स तंत्रज्ञानाचा अभ्यास काळाची गरज – श्री. दिपक कक्कर

संगमेश्वर कॉलेजमध्ये 'हॅंड्स ऑन रोबोटिक्स' विषयावर राष्ट्रीय कार्यशाळा संपन्न

सोलापूर : ११ सप्टेंबर २०२५

आधुनिक काळामध्ये नवनवीन तंत्रज्ञानाची निर्मिती होत आहे. त्यामध्ये रोबोटिक्स तंत्रज्ञान अतिशय महत्त्वाचे ठरतेय. उद्योग, आरोग्य, शेती याबरोबरच शैक्षणिक क्षेत्रातही या तंत्रज्ञानाचा वापर केला जात आहे. याचा अंतर्भाव नवीन अभ्यासक्रमात करून विद्यार्थ्यांना याचे प्रशिक्षण देणे ही काळाची गरज आहे. असे विचार प्रसिद्ध तंत्रज्ञान तज्ज्ञ, उद्योगपती व झुआरी सिमेंट, सोलापूरचे प्लांट प्रमुख श्री. दिपक कक्कर यांनी मांडले.

संगमेश्वर कॉलेजमधील इलेक्ट्रॉनिक व भौतिकशास्त्र विभाग तसेच सुव्ही इन्स्ट्रुमेंट सोलापूर यांच्या संयुक्त विद्ममाने आयोजित एकदिवसीय राष्टीय कार्यशाळेत ते बोलत होते. कार्यक्रमाच्या अध्यक्षस्थानी पुण्यश्लोक अहिल्यादेवी होळकर सोलापूर विद्यापीठातील स्कूल ऑफ फिजिकल सायन्स विभागाचे संचालक डॉ. व्ही.बी.पाटील होते. श्री. कक्कर यांनी आपल्या भाषणात रोबोटिक्स तंत्रज्ञानावर विविधांगी विचार मांडले.  विशेषत: त्यांनी विद्यार्थ्यांना या तंत्रज्ञानाचा सखोल अभ्यास करण्याचा सल्ला दिला. आज अशा प्रकारच्या तंत्रज्ञानाचे प्रत्यक्ष कौशल्य आत्मसात करणे अत्यंत गरज आहे. या कार्यशाळेच्या निमित्ताने याची मूलगामी चर्चा होत असून त्याबद्दल संयोजकांचे त्यांनी कौतुक केले. अध्यक्षीय मनोगतात डॉ. पाटील यांनी राष्ट्रीय शैक्षणिक धोरणावर विचार मांडले. एनईपीनुसार सर्व विद्यार्थ्यांना अशा आंतरविद्याशाखीय अभ्यासाची गरज आहे. यातूनच करिअरच्या विविध संधी त्यांना प्राप्त होणार आहेत. असे विचार त्यांनी मांडले. या कार्यशाळेत डॉ. प्रसन्न् गव्हाणे, श्री. अमित जगधाने, रोहन काळे यांनी सुध्दा मार्गदर्शन केले. या कार्यशाळेत महाराष्ट्राबरोबरच कर्नाटक, तेलंगाणा राज्यातील एकूण १३५ अभ्यासकांनी सहभाग घेतला.

कार्यशाळेच्या उद्घाटन सत्रात मान्यवरांचे स्वागत कला शाखेचे उपप्राचार्य डॉ. सुहास पुजारी यांनी तर प्रास्ताविक कार्यशाळा समन्वयक डॉ. पुष्पांजली मेत्री यांनी केले. पाहुण्यांचा परिचय डॉ. महेंद्र कावळे यांनी करून दिला. आभार डॉ. प्रतापसिंह गोरेपाटील यांनी मानले. तर सूत्रसंचालन अश्विनी घोडके, मोमिन ताहुरा, दीक्षा पाटील, सुभी तिवारी यांनी केले. या कार्यशाळेच्या यशस्वीतेसाठी डॉ. एस. एस. गावंडे, डॉ. एस. एस. करांडे, डॉ. ए. जी. मॅमथा, एस. जी. चेंडके, डॉ. एस. एस. पाटील, डॉ. सुहास गाडे, डॉ. ढोणे, डॉ. ए. व्ही. दिवटे, डॉ. एम.बी. बगले, डॉ. मंडले, डॉ. के.डी. गायकवाड, डॉ. सुहास दहिटणेकर आणि विद्यार्थ्यांनी विशेष कष्ट घेतले.